ភ្នំពេញ៖ អ្នកនាំពាក្យក្រសួងអប់រំ លោក រស់ សុវាចា បានឲ្យ EAC News ដឹងថា ក្រសួងបានសម្រេចកំណត់យកថ្ងៃទី២៧ ខែធ្នូ ឆ្នាំ២០២១ ជាថ្ងៃប្រលងសញ្ញាបត្រមធ្យមសិក្សាទុតិយភូមិ ឬបាក់ឌុប។

ការកំណត់យកថ្ងៃទី២៧ ខែធ្នូនេះ គឺបានរំកិលពេល ២១ថ្ងៃ ពីកាលបរិច្ឆេទចាស់ដែលកំណត់យកថ្ងៃទី៦ ធ្នូ។

ក្នុងពេលចុះពិនិត្យ និងសម្ពោធវិទ្យាស្ថានស្រាវជ្រាវសេដ្ឋកិច្ចអាស៊ាននៃសាកលវិទ្យាល័យជាតិគ្រប់គ្រងកាលពីរសៀលថ្ងៃទី៣ ខែវិច្ឆិកា រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន លើកឡើងថាការប្រឡងមធ្យមសិក្សាទុតិយភូមិនឹងត្រូវពន្យារពេល ដោយថាដើម្បីទុកពេលវេលាឲ្យសិស្សត្រៀមខ្លួនប្រលង។

ថ្លែងក្នុងពិធីបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ ជុំទី១ សម្រាប់ក្រុមអាយុចាប់ពី ៦ឆ្នាំឡើង ក្នុងក្របខណ្ឌទូទាំងប្រទេស និង ប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុ ៥ឆ្នាំ នៅថ្ងៃចន្ទ ទី១ ខែវិច្ឆិកា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងថានឹងមិនលុបការប្រឡងបាក់ឌុបក្នុងឆ្នាំនេះដូចឆ្នាំ២០២០ នោះទេ ដោយជំរុញដល់សិស្សដែលរៀនទី១២ ប្រឹងរៀនសូត្រដើម្បីទទួលបានលទ្ធផលល្អក្នុងការប្រឡង៕